MATOKEO YA CHANJO DHIDI YA EBOLA KUJULIKANA DECEMBER

Shirika la Afya Ulimwenguni WHO limesema kwamba matokeo ya awali ya aina mbili za chanjo dhidi ya maradhi ya Ebola yanatarajiwa kutolewa mwishoni mwa mwaka huu.

Shirika hilo limesema majaribio ya kitabibu yanayoendelea au yanayopangwa kufanywa Ulaya, Afrika na Marekani, yanatarajiwa kurudisha data ifikapo mwishoni mwa mwezi Desemba.

 Naibu mkurugenzi mkuu wa WHO anayehusika na mifumo ya afya na utafiti Dr Marie Paule Kieny amesema kwa uhakika majaribio hayo yataanza mnamo wiki mbili zijazo.

Afisa huyo amesema matokeo ya majaribio ya chanjo hoizo mbili zinazotoa matumaini, Chimp adenovirus na Chanjo ya VSV, yatakuwa ni ya mwanzo tu, na kwamba majaribio hayo yataendelea kwa kipindi cha kati ya miezi sita hadi 12. 

Ameongeza hata hivyo kuwa malengo yao kwa sasa ni kuweza kutambua usalama wa chanjo hizo, na kiwango cha dawa inayohusika katika chanjo yenyewe ifikapo mwishoni mwa mwaka huu.

NA DW SWAHILI