Ujumbe wa mssada wa Uingereza wawasili Sierra Leone

Waziri wa Uingereza anayehusika na maendeleo ya kimataifa Justine Greening yuko ziarani nchini Sierra Leone, mojawapo ya nchi zilizoathiriwa vibaya na mlipuko wa ugonjwa wa Ebola. 

Waziri huyo ameandamana na wanajeshi wapatao 100, ambao ni sehemu ya ujumbe wa msaada kutoka Uingereza kusaidia katika mapambano dhidi ya Ebola.

Akizungumza mjini Freetown waziri Greening amesema athari mbaya zaidi ya Ebola kwa Sierra Leone ni kukwama kabisa kwa mfumo wa afya nchini humo.

 Amesema pia kuwa ilikuwa inasikitisha kwamba wahudumu wa afya walioongoza mapambano dhidi ya maradhi hayo walikuwa wamepoteza maisha yao.

Waziri huyo amesema kuwa msaada wa nchi yake utakuwa muhimu katika kukarabati mfumo wa afya wa Sierra Leone, na kuwapa matibabu wauguzi pamoja na watu wengine walioambukizwa Ebola.

Tangu kuanza kwa mlipuko huu mpya wa Ebola magharibi mwa Afrika, tayari watu zaidi ya 4500 wamekwishakufa, wakiwemo wahudumu wa afya wasiopungua 200. 

Vifo vingi vimetokea katika nchi tatu zilizoathiriwa zaidi, ambazo ni Guinea, Liberia na Sierra Leone.