Ujerumani Bayern Munich wameisambaratisha Roma ya Italia

Na katika michezo mabingwa wa Ujerumani Bayern Munich wameisambaratisha Roma ya Italia kwa kuifunga magoli 7-1 katika mechi ya kundi E ya mabingwa wa Soka barani Ulaya, Champions League.

Sherehe hiyo ya magoli ilianza katika dakika ya tisa ya mchezo kwa bao la kusisimua lililoingizwa na mchezaji wa kiungo, Arjen Roben. Timu nyingine ya Ujerumani iliyocheza jana, Schalke iliifunga kwa taabu Sporting Lisbon iliyokuwa na wachezaji 10 uwanjani, kupitia mkwaju wa penalti uliotolewa kwa njia yenye utata. Matokeo ya mwisho katika mechi hiyo ya kundi G yalikuwa Schalke 4-Sporting Lisbon 3.

Kwingineko Chelsea ya Uingereza iliilaza Maribor magoli 6-0, lakini ikapata pigo la majeraha kwa washambuliaji wake wawili, Roic Remy na Diego Costa, ambao hawataweza kucheza mechi dhidi ya Manchester United mwishoni mwa juma. Barcelona ya Uhispania pia iliibwaga Ajax ya Uholanzi kwa magoli 3-1, nyota wake Neymar na Lionel Messi wakitikisa nyavu.