UN: Uhalifu dhidi ya wayazidi waweza kuwa ''mauaji ya halaiki'

Umoja wa Mataifa umesema kuwa kampeni ya mauaji inayofanywa na kundi linalojiita Dola la Kiislamu, IS dhidi ya jamii ya wayazidi ambao ni wachache nchini Irak, yaweza kuchukuliwa kama jaribio la mauaji ya halaiki.

Hayo yametangazwa na naibu katibu mkuu wa umoja huo anayehusika na haki za binadamu Ivan Simonovic, baada ya kurejea kutoka ziarani nchini Irak. 

Somonovic amesema IS imekuwa ikiwashurutisha wayazidi kubadilisha dini na kuwa waislamu, na kutishia kuangamiza wote watakaokaidi matakwa hayo ili kumaliza kabisa dini yao.

Mwezi Agosti mwaka huu rais wa Marekani Barack Obama aliidhinisha mashambulizi ya anga dhidi ya kundi la IS, kwa madhumuni ya kuzuia mauaji ya halaiki dhid ya wayazidi ambayo kundi hilo lilikuwa likiazimia kuyafanya baada ya kuyateka maeneo makubwa kaskazini mwa Irak.